Roi-Negga, 13. März 2020. (red/pro) Wege demm Corona-Virus isses wischdisch, uff ä paar Dinge zu achde, die iwwerlebensnotwendisch sinn. Mir hänn die wischdigschde Regle zammegefasst.
Vun Helle Sema
- Obachd! Des is jetztert kä offizielle Meldung, wie mon die von denne Boiameschder un annere kennt, sondern in äfacher Sproch fer Disch und misch, damit mon es a kapiere konn.
- Loss der die Schdimmung ned vermiese, a, wann alle Forz lang äner mänd, die Welt ging unner.
- Corona mänd ned des lumbisch Bier, sondern des schuffel Virus.
- Soi kän Babbsack un wesch der die Flosse grindlisch wie än Dibbelschisser un efter als sunschd, also däglisch un imma, wonn de uf de Gass warschd (sag dodebei mindeschdens ze mol „Hoch lebe die Palz“). Un nimm Säf, Forzkopp!
- Wonn de niese tue muschd oder huschde, dann mach des in die Beug vum Arm und ned in die Händ und schun gar ned nem annere in die Fress, Gibskopp.
- Wonn de a Rotztuch benutze tuschd, sei kän Schwob und werfs hinnerher glei weg.
- Guck, dass de genug Grundnahrungsmiddel vorrädisch hoschd, also so zwanzisch Flasche Riesling un Blubberwasser. Ä paar Reddisch sinn a ned schlechd. Brodworschd un Grummbere hoschd hoffendlisch imma dehäm.
- Nä, Dappschädel, ab sofort dringschd nimmi bei onnere mit. Jedem soin ägener Schobbe.
- Wonn de unbedingt mit annere saufe muschd, halt Abschdand zu denne annere, zwe Meder is gud. Do konn man ned astoße, is hald so.
- Nä, des is kän Kokolores – Garantän oihalte is ganz wischdisch. Besonners gegeiwwa Saalänner.
- Geh ned uff die Schossee, wonn de ned muschd un wonn tu känner abknudsche.
- Wannere konschd gehe, vergess de Prowiond ned.
- Ansunschde, falls die Krenk hosch, alles Gudde! Des werd schun widda.
